*~*புதுப்பானை உதடு!*~*

by Tamilkings Sun Jan 23, 2011 5:24 am

புதுப்பானை உதடு!

செந் நெல் வெளஞ்சு நிக்கும்
செங்காத்து பூமி
நாலு போகம் அள்ளித் தரும்
நஞ்ச நிலம் சாமி

யானைகட்டி போரடிச்ச
எங்க தமிழ்ச் சாதி
சக்கரப் பொங்க வெச்சு
தல நிமிரும் மீதி...

பஞ்சத் தலமுறதான்
பசியாறும் மாசம்
புஞ்சவயக் காடெல்லாம்
பூவாசம் வீசும்

வெதச்ச வேர்வைத் துளி
வெள்ளாமயா தேறும்
வெவசாயி வீடெல்லாம்
வெளிச்சமா மாறும்

சேத்து வயலாடி
தேஞ்ச ஏர்க் கலப்ப
குளிச்சு பூச்சூடி
கொஞ்சம் எளப்பாறும்

கூரான கறுக்கருவா
குங்குமத்தச் சூடும்
சமஞ்சதுங்க கழுத்திலெல்லாம்
தாலிக்கொடி ஆடும்

பொல்லாத வறுமையெல்லாம்
போகியில எரியும்
புதுப்பான உதடெல்லாம்
பொங்கப் பால் வழியும்!

வரப்பெல்லாம் வகிடெடுத்து
வாய் நிறைய சிரிக்கும்
கண்ணீரும் தெவிட்டாத
கற்கண்டா இனிக்கும்

மாவில தோரணம்தான்
மாடத்துல ஏறும்
சாதிசனம் ஒண்ணு கூடும்
சங்கதியக் கூறும்

வெட்டிவெச்ச செங்கரும்பா
வெளுக்கும் தை கிழக்கு
பஞ்சத்த துடைக்குது பார்
பாட்டாளி ஒழக்கு!

~புதுப்பானை உதடு!~

~புதுப்பானை உதடு!~